My New Site

Autor: Servicios Galicia

  • CCOO Servizos firma un preacordo con Adecco Outsourcing Pontevedra para mellorar as condicións de traballo

    O pasado sábado día
    4, tras ser exposto e debatido en asemblea xeral de traballadores,
    vén de ser aprobado pola unanimidade dos compañeiros presentes o
    preacordo que esta sección sindical alcanzou coa dirección da
    empresa acerca de bolsa de horas, xornada anual, prezo horas extra e
    ITs    , e cuxa asina será ratificada nos próximos días, tendo unha
    validez que comprende desde o día 1 de xuño até o 31 de decembro
    do ano 2017.

    Desde a nosa sección
    sindical e xa desde un primeiro momento, comprendemos que este era un
    acordo de carácter urxente, xa que constituía o maior dos problemas
    que viñamos mantendo e que primeiro había que afrontar, dado que o
    futuro inmediato dos servizos estaba seriamente comprometido, e
    dedicamos todos os nosos esforzos e o noso tempo para tratar de
    conseguir a mellor das solucións posibles. É por este motivo que
    centros como o de Antolín non foron visitados e apenas informados, e
    entendemos a lóxica sensación de orfandade que poidan sentir pola
    cal, sinceramente, pedimos desculpas. En calquera caso, gustaríanos
    que comprendesen que non foi por abandono ou falta de interese, senón
    por dedicarnos por completo á consecución deste difícil acordo no
    que, en todo momento, como compañeiros que son, foron tidos en conta
    de igual maneira que os demais. Unha vez obtido este acordo, de agora
    en diante serán debida e igualmente informados que o resto dos seus
    compañeiros. Segue

    Doutra banda, é
    momento de empezar a traballar na solución doutros problemas, e é
    por iso que xa sido posta sobre a mesa da dirección a problemática
    de cobro dos traballadores do centro de Antolín que cobran as súas
    nóminas a día 10, do mesmo xeito que calquera ETT, e que, ademais
    dun agravio comparativo, suponlles un sobrecusto bancario en calidade
    de intereses ao ser a entidade a que adiante os pagos dos recibos,
    hipotecas, etc. A dirección deu resposta e di que pasará a estudar
    a situación e que contestará nos próximos días, non sen antes
    aclarar que esta fórmula de pago é a habitual na empresa fóra dos
    centros GEFCO, onde ao parecer existiría un acordo entre ambas as
    empresas para que se pagase a finais de mes.

    Aproveitamos para
    informarvos, ademais, da apertura das negociacións dun Convenio
    Nacional de Adecco Outsourcing    , das que formaremos parte e de cuxa
    marcha seredes informados. No noso afán de cambiar e mellorar as
    cousas, namentres, e dado que as negociacións dun convenio poden dilatarse, tal e como fixemos co acordo alcanzado, comezaremos a
    establecer un paquete de problemas e medidas que podamos expor e aos
    que trataremos de buscar a mellor das solucións posibles sen ter que
    esperar á firma do devandito convenio.

    Sen outro
    particular, indicámosvos o correo electrónico ao que podedes
    dirixirvos e enviar calquera problema ou asunto que queirades expor e
    que será debidamente estudado, xa por nós como sección sindical,
    xa polo comité. Saúdos compañeiros.

    DELEGADOS SECCIÓN SINDICAL CCOO.

    correo electrónico:
    delecomitccoo@gmail.com

  • Condolencias falecemento

    Dende a Federación de Servizos de CCOO e dos nosos representantes no comité de empresa de Gran Hotel de la Toja, queremos expresar a nosas condolencias á familia e compañeiros, polo falecemento o día cinco desde mes do compañeiro de CDI-CSIF, Rafael Rodríguez Dovalo.

  • A declaración de Zona de Gran Afluencia Turística nunha Cidade non pode supor a precarización do emprego e a perda de dereitos

    A
    Federación de Servizos de CCOO de Galicia quere saír ao paso das
    declaracións vertidas na prensa por parte da Patronal de Grandes
    Almacéns (ANGED), nas que vén dicir que deixar fóra das
    devanditas zonas ás grandes cadeas de distribución evita a
    competitividade das tendas físicas vs tendas online e evita a
    creación de centos de postos de traballo que serían necesarios para
    atender un horario comercial máis amplo.

    É
    necesario aclarar que a Patronal ANGED xa vén pedindo desde hai
    moitos anos a liberalización total do comercio e só grazas ao
    rexeitamento dos Sindicatos e do Pequeno Comercio se puido evitar. 

    Esta Patronal sempre argumenta que esta liberalización vai crear emprego, e con todo, ano tras ano o que fai é precarizar a situación no sector, asinando convenios cos seus sindicatos afíns que van minguando as condicións de traballo nos centros. Só no último convenio pasouse a aumentar a xornada en 28 horas anuais e deixar de remunerar os domingos e festivos pasando a traballarse coma se dun día máis se tratase (co que nos podemos imaxinar en que situación nos quedariamos se, como pretenden, nos fan abrir todos os domingos e festivos do ano). Segue

    Por
    suposto non aceptamos tampouco que se defina ao comercio como un
    servizo público, ANGED confunde e esquécese de engadir a
    preposición e definilo como o que realmente é, «un servizo para
    o público».

    Entendemos
    que o desafío do comercio hoxe pasa por entender as necesidades do
    consumidor ofrecéndolle o que necesita e mantendo un bo ambiente
    laboral nas tendas para que o traballador poida desenvolver o seu
    traballo en condicións óptimas, e non en fomentar o consumo
    irresponsable e baixar prezos á conta das condicións laborais dos
    traballadores.

    Por
    último, se ANGED o que propón é que nos acheguemos ás condicións
    de libre apertura de Portugal, nós propomos achegarnos ás
    condicións doutros países onde tamén no comercio se pode conciliar
    a vida familiar e laboral.

    En
    definitiva estamos de acordo en afrontar ese debate coherente sobre o
    futuro do comercio, sempre que sexa iso (coherente), e non busque
    precarizar aínda máis as condicións xa de seu inasumibles de todos
    os traballadores e traballadoras do comercio, e considerando que 12
    horas ao día 6 días á semana son máis que suficientes para
    atender ao consumidor.

  • Saímos de novo á rúa: ABANCA despide inxustamente. READMISIÓN!!

    Tal como informábamos o día vinte deste mes, volvemos a concentrarnos esixindo a readmisión do compañeiro despedido.

  • Liberalización de horarios: A zona de libre horario comercial limitarase ao Casco Vello, ensache e Bouzas

    Tras
    unha intensa negociación na que participamos CCOO, UGT e CIG,
    finalmente chegouse a un acordo para delimitar a Zona de Gran
    Afluencia Turística na cidade de Vigo, na que se permitirá a
    apertura do comercio todos os días do ano.

    As primeiras propostas que se puxeron enriba da
    mesa, e que incluían zonas como a Gran Vía, a Rúa do Príncipe ou
    o Centro Comercial A laxe, tiveron por parte das tres centrais
    sindicais unha resposta contundente de negativa absoluta, sendo
    preciso realizar accións encamiñadas a conseguir que non se
    incluísen estas zonas e tampouco establecementos de mais de 300
    metros cadrados. Solicitáronse concentracións ás portas do
    Concello de Vigo, a primeira delas onte pola mañá, que se mantivo
    como asemblea, á espera do desenvolvemento dunha reunión urxente.

    Continúa

    Na citada reunión, celebrada onte entre os tres sindicatos, as asociacións de comerciantes e o goberno municipal, alcanzouse o acordo de que a zona na que se poderá abrir ata as 10 da noite, sexa a correspondente a rúa San Francisco, paseo de Alfonso, Cachamuíña, paseo de Granada, Segunda República, Policarpo Sanz, García Barbón e Arenal ( só ata o cruzamento da rúa de Pontevedra), Montero Ríos, Cánovas do Castelo e a zona vella de Bouzas. Queda excluído o centro comercial A Laxe, o barrio de O Cura, e parte do Ensanche.

    Por parte de CCOO, desde que saíu a lei sobre apertura dominical no ano 2012, e posterior ampliación en 2014, mantivemos a nosa oposición a esta lei e á apertura do comercio en domingos e festivos (ligazón). Como non podía ser doutra forma, en Vigo e ante a conxuntura de superación das 600.000 pernoitas que marca esta lei para que sexa declarada Zona de Gran Afluencia Turística, opuxémonos rotundamente, a pesar do cal buscamos unha solución para evitar que puidesen abrir legalmente, máis domingos e festivos dos establecementos que xa o fan actualmente.

    Finalmente conseguimos o noso propósito: que a zona delimitada non inclúa ningún establecemento de máis de 300 metros, ningunha área comercial e eliminar zonas de complicado encaixe como Zona Turística, limitándose exclusivamente ás zonas consideradas Casco Vello da cidade.

    Queremos resaltar a participación activa neste proceso ademais da Unión Comarcal de Vigo e a Federación de Servizos de Galicia, do Comité de Empresa de Mediamark Vigo e os delegados e delegadas de Comercio, que asistiron a Asamblea-Concentración de onte día 23. Unha vez mais demostrase que a Negociación-Presión e o traballo conxunto son a formula para conseguir os nosos obxetivos.