My New Site

Autor: Servicios Galicia

  • As traballadoras e traballadores dos centros de chamadas maniféstanse na Coruña en defensa do seu convenio

    A Federación de Servizos de CCOO de Galicia informa de que as traballadoras e traballadores dos centros de chamadas (contact center) se manifestarán na Coruña o venres en defensa do seu convenio colectivo. Segundo o sindicato, as negociacións están bloqueadas por mor da actitude da patronal. A mobilización partirá do Obelisco e rematará na praza de Mina, pasando o seu percorrido por diante das principais empresas do sector e dos seus grandes clientes.

    Deste xeito, a marcha transitará por diante das instalacións de centros de chamadas como Teleperformance, Konecta, Gestión C, Prosegur Avos ou DXC Techonology, así como das oficinas de Abanca, Santander, BBVA, Caixabank ou R Cable, principais destinatarias en Galicia dos seus servizos. Ler máis

    Segundo CCOO, o sector dos centros de chamadas emprega en Galicia a máis de dez mil persoas cuxo convenio leva caducado máis de dous anos —expirou o 31 de decembro do 2019— e os salarios conxelados.

    CCOO-Servizos lembra que, debido á pandemia, o sector experimentou unha «excepcional» carga de traballo, permitindo que empresas consideradas esenciais puideran xestionar servizos «vitais» e mantiveran a atención ao público. Malia o esforzo realizado, nin sequera se lles retribuíron os gastos derivados do teletraballo, denuncia Comisións.

    O bloqueo das negociacións débese, segundo CCOO, á pretensión da patronal de «desvalorizar cada vez máis as condicións laborais neste sector, xa de seu precarias»». O sindicato denuncia que as empresas do sector e os seus clientes —a meirande parte cotizando no IBEX-35— leven anos incrementando facturación e beneficios, mentres as traballadoras e traballadores perciben salarios «en niveis do SMI e perdendo poder adquisitivo pola conxelación salarial e a inflación».

    Convocatoria

    –  Día: venres, 18 de marzo de 2022

    –  Hora: 11:30

    –  Lugar: saída do Obelisco e remate na praza de Mina, na Coruña

    – Asunto: o sector dos centros de chamadas maniféstase na Coruña en defensa do seu convenio

  • Lento avance no convenio de Comercio Alimentación Coruña

    Discutimos sobre os novos modelos de contratación e a aplicación da reforma laboral para conseguir unha maior estabilidade da contratación indefinida. Aínda que para nós este tema é moi importante, desde logo non pode ser o único en que centrar a negociación.

    Demos tamén contestación a algunha das propostas da patronal:

    • Non podemos asinar, como pretenden, un convenio a 8 anos coa incerteza actual e sen un compromiso de mantemento do poder adquisitivo se o IPC segue polas nubes.

    • Non cremos necesario incrementar os períodos de proba para as novas contratacións.

    • Non estamos dacordo no tratamento que pretenden dar a algunhas licenzas.

    • E o que é incocebible a estas alturas é que sigamos sen saber que pretenden propor como incremento salarial.

    CCOO entenderá un intento de paralizar a negociación de forma inxustificada se na próxima reunión que se celebrará o día cinco de abril, a patronal non trae unha proposta de incremento salarial,

    Xa é hora de que a patronal saia do seu inmobilismo, de que aporte unha proposta salarial e de empece a falar con seriedade doutros temas importantes como por exemplo:

    • Xornada de traballo: Redución Xornada Anual, Xornada Continua.

    • Fins de Semana de Calidade: Garantir un Mínimo Anual.

    • Licenzas Retribuidas: Melloras e recoñecemento real de parellas de feito.

    • Eliminación do Grupo IV: Que se usa para reducir salarios inxustificadamente.

  • Pesar polo falecemento do compañeiro Jesús Aneiros, antigo strio. de organización de Banca e Aforro de CCOO

    A Federación de Servizos de CCOO en Galicia lamenta o falecemento do compañeiro Jesús Aneiros Rodríguez, antigo secretario de organización da Federación de Banca e Aforro de CCOO.

    A secretaria xeral da Federación de Servizos, Lucía Trenor, así como o resto dos compañeiros e compañeiras da Federación, envíalles as máis expresivas condolencias á súa familia e amizades.

    Foi un dos primeiros impulsores da Federación de Banca en Coruña ademais de secretario xeral da sección sindical de Caixa Galicia.

  • 8M: Das palabras aos feitos. Para a igualdade temos un plan

    CCOO quere seguir traballando día a día no obxectivo de conseguir mellorar as condicións de vida e de traballo das mulleres con feitos concretos. A actuación cotiá de defensa da igualdade e a loita contra a discriminación levou ao sindicato á aprobación por unanimidade da inclusión do feminismo como principio estatutario de CCOO no seu 12º Congreso Confederal."Isto implica asumir o feminismo e a perspectiva de xénero en todas e cada unha das súas políticas de maneira transversal con feitos e non só con palabras", segundo o sindicato, que considera que feitos como a subida do salario mínimo interprofesional (SMI) ou a reforma laboral supoñen unha mellora importante na vida das mulleres, sobre todo, no caso das máis vulnerables. Ler máis

    É por iso que CCOO quixo pór en valor o traballo do sindicato. "Os centros de traballo son o espazo onde se desenvolve a actividade sindical e é alí onde o sindicato vai levar o feminismo. Os dereitos fundamentais non se deixan nas portas das fábricas", di o manifesto.

    DAS PALABRAS AOS FEITOS

    "Pasamos das palabras aos feitos, porque os últimos reais decretos que negociamos permítennos situar os plans de Igualdade como ferramenta feminista que reverta os desequilibrios laborais, económicos e sociais entre homes e mulleres en miles de empresas deste país", di CCOO, que insta a que se cumpra o establecido nas normas e a que as empresas pequenas apliquen medidas e as grandes e as administracións públicas negocien e tamén apliquen os plans de igualdade.

    CCOO cre que é o momento de levar o esforzo feminista do sindicato dos últimos anos ás relacións laborais, xa que a acción sindical organizada ao redor da centralidade do traballo promove a expansión dun sindicalismo feminista, universal e integrador que converta ao sindicato en ?un axente de igualdade, dinámico e socializador, onde as feministas de todo tipo conflúen?.

    "Queremos recoñecer o traballo cotián feminista que delegadas e delegados realizan na súa actividade diaria, pero tamén usar o 8M para que nos centros de traballo debátase sobre as desigualdades e discriminacións existentes neses centros e dentro das súas empresas", di o sindicato.

  • CCOO informa dun novo impagamento de nóminas en Abante BPO Lugo e presenta unha denuncia na Inspección de Traballo

    A Federación de Servizos de CCOO de Galicia denuncia que continúan os incumprimentos de Abante BPO Lugo no que respecta ao pagamento dos salarios. Segundo o sindicato, a día de hoxe a empresa aínda non pagou a extra de decembro nin tampouco a nómina ordinaria do mes de febreiro. CCOO amosa a súa preocupación polo rumbo de Abante ante a «nefasta xestión» da súa dirección, o que lle valeu ata o momento dúas denuncias na Inspección de Traballo.

    Desde que os actuais xestores se fixeron cargo de Abante, o comité só conseguiu reunirse en dúas ocasións coa dirección. A primeira, o pasado 13 de decembro, cando se anunciou a compra. A segunda, o 3 de febreiro, cando a dirección informou de que estaba a facer as xestións oportunas para poder pagar a extra de decembro, non aboada «por problemas de liquidez».

    Constatado tamén o atraso no pagamento da mensualidade de febreiro, a sección sindical de CCOO tentou poñerse en contacto coa empresa en reiteradas ocasións para instala a reunirse co comité. A resposta foi que se estaban a facer «esforzos» para o pagamento e declinando convocar xuntanza ningunha.

    Ante esta situación, CCOO presentou unha nova denuncia na Inspección de Traballo, que se suma á interposta xa o pasado mes de decembro.