My New Site

Autor: Servicios Galicia

  • CCOO reclama a Inditex que paralice os peches de tendas ata que se acade un acordo laboral sobre as implicacións do seu plan estratéxico 2020

    Desde o sindicato pídese á Dirección do Grupo en España que paralice os peches de tendas que xa se están producindo en diferentes territorios e marcas en execución do Plan Estratéxico 2020-2022 -que inclúe a absorción de entre 250 e 300 tendas en España-, en tanto se concrete o compromiso, acadado co Comité de Empresa Europeo o pasado 17/06, de abordar o impacto laboral do devandito Plan coa participación das organizacións sindicais de cada país, priorizando a estabilidade e recualificación do persoal. Ler máis

    O pasado 10/06/2020, na presentación de resultados do primeiro trimestre de 2020, o Grupo Inditex anunciou unha actualización da súa estratexia 2020-2022, acelerando o cambio do seu modelo de negocio, integrando venda presencial e online, con maior superficie comercial aínda que menor número de tendas, o que implica o peche e absorción de entre 1.000 e 1.200 tendas de perfil máis pequeno a nivel mundial  e entre 250 e 300 en España (o 14% da súa rede mundial e ao 17% da súa rede en España aproximadamente).

    Posteriormente, na reunión do Comité de Empresa Europeo, celebrada o 17/06/2020, a Dirección do Grupo Inditex comprometeuse a que esta importante reestruturación se efectuse priorizando a estabilidade no emprego do persoal, ofrecendo postos de traballo para cubrir as necesidades xeradas polo novo modelo ás persoas que traballan nas tendas que se pechen, así como abordando as implicacións laborais desta reestruturación coa participación da representación sindical en cada país. Un compromiso que desde CCOO valoramos moi positivamente, do mesmo xeito que o fixemos coa garantía do 100% de retribucións durante o estado de alarma (no caso de España asumindo a integridade de custos laborais, sen presentación de ERTE) e cos acordos que alcanzamos con data 21/05/2020 e 7/06/2020 no conxunto de marcas en España, para abordar no plano laboral a desescalada e a continuación da actividade.

    No entanto, sempre que se concreta este compromiso, abrindo unha mesa de negociación coa representación sindical na que se aborden as implicacións laborais do plan estratéxico, xa se están producindo peches de tendas en diversos territorios e marcas, ou no seu caso anuncios de peches inminentes, que se saldan mediante ofertas individuais de traslado ou extintivas. Unha política que desde CCOO entendemos como anticipatoria dos peches previstos e que, con independencia de que responda a unha estratexia global ou a iniciativas puntuais dos responsables de recursos humanos, debe paralizarse ata que se acade un acordo laboral a nivel do Grupo Inditex en España.

    Desde CCOO reclamamos á Dirección do Grupo Inditex que dea as instrucións para paralizar estes peches, á vez que se calendariza un proceso de diálogo construtivo baseado na responsabilidade e compromiso mutuos, para acadar marcos de acordo baseados no mantemento do emprego e as condicións laborais, con medidas de flexibilidade interna, protocolos que regulen os procesos de absorción de tendas e unha aposta estratéxica pola formación e recualificación do persoal.

    cadro datos

  • Teleperformance A Coruña despreza ao persoal e a Inspección de Traballo

    Teleperformance, en A Grela, é unha empresa de Contact Center, que ocupa a máis de 800 empregadxs dando servizos a grandes multinacionáis tanto de telecomunicaciós, enerxéticas e outros servizos. Según indica na súa páxina web, forma parte do 20% de empresas que están contratando durante a crise sanitaria.

    O Comité de Empresa de Teleperformance A Coruña denuncia:

    Teleperformance nesta crise demostrou a súa incompetencia e falta de investimento para implementar o teletraballo. Obriga ao persoal a asumir todos os custos xerados polo traballo no domicilio (equipos, conexión a internet, luz…) sen recibir ninguna contraprestación. Incluso Teleperformance continúa cos descontos en nómina por desconexións alleas ao persoal a pesar da última Resolución de Inspección de Traballo, onde se indica que non poden facelo. Ler máis

    Teleperformace decide non continuar co departamento INFO R Telecable e Telecomunicaciones, despois de máis 20 anos sendo unha das campañas estrela da empresa.

    Ademais non acepta ningún tipo de solicitude do persoal por escrito ou correo electrónico, senón que obriga a empregar a súa ferramenta interna, sabendo dos seus múltiples fallos e carencias. Con esta práctica pretende alonxar ao persoal da representación sindical e incumpre os acordos acadados entre Comité e empresa en materia de canles de comunicación.

    Teleperformance toma decisións que afectan ao persoal de forma unilateral sen dar traslado e posibilidade de negociación á Representación Legal dos/as traballadores/as.

    POR TODO ISTO O comité de empresa convoca por estes motivos concentración de delegados/as o luns 20 de xullo ás 12:00 hrs. diante da delegación de Teleperformance A Coruña

  • CCOO asina un acordo para reforzar as medidas preventivas e compensar o persoal de Lidl polo esforzo realizado durante o estado de alarma

    Tras a folga convocada en solitario por CCOO-Servizos, a dirección de Lidl España rectificou e decidiu sentar a negociar co sindicato. O resultado é un acordo que reforza as medidas de prevención nos centros de traballo da cadea de supermercados e compensa tamén o esforzo realizado polo persoal desde que se estableceu o estado de alarma. Ler máis

    Entre as medidas preventivas cabe destacar o compromiso da empresa por controlar a cabida das tendas e a creación dunha comisión de seguimento COVID-19 para xestionar os posibles brotes e actuar en consecuencia. Por outra banda, chegouse tamén a un acordo para xestionar as horas negativas, isto é, as horas en que non se puido traballar pola redución do horario das tendas durante o estado de alarma.

    CCOO-Servizos valora de forma moi positiva este acordo, tanto polo seu contido, como por representar a finalización deste conflito colectivo e o cambio de actitude da empresa. Lidl ten aproximadamente oitocentos traballadores e traballadoras en Galicia e CCOO é o sindicato maioritario, con 16 delegados e delegadas, que supoñen a metade da representación sindical na empresa.

    Acordo Covi19 LIDL

  • Teletraballo, veu para quedar. Desconexión dixital

    O teletraballo é unha forma de organización e prestación do traballo que responde tanto á innovación e implementación das novas tecnoloxías da información e a comunicación, canto aos requirimentos de maior flexibilidade organizativa nunha contorna cambiante.

    A esta forma flexible de organización é frecuente atribuírlle extraordinarias capacidades en orde a mellorar as necesidades, sexa de conciliación da vida laboral e familiar, de flexibilidade, de produtividade, sexa, mesmo, de incrementar a activación de colectivos especialmente vulnerables, como serían as persoas con discapacidade

    O teletraballo non é apto para todo tipo de traballos, senón que só é posible para aquelas tarefas teletraballables, é dicir, aquelas que poden realizarse a través de medios tecnolóxicos.

    Aínda que, aos comezos nos que se empezou a falar e implantar este modo de traballo se previron unhas grandes expectativas de desenvolvemento e implantación, e a pesar da maior dispoñibilidade de medios tecnolóxicos cada vez máis avanzados, non tivo o desenvolvemento previsto. O porqué non se cumpriron esas expectativas é un tema controvertido, prognosticábase en moitos foros e investigacións un gran número de persoas teletraballando nun limitado espazo de tempo que despois non chegou a cumprirse, chegouse a supor que o teletraballo podía supor unha revolución nas formas de organizar o traballo, pero isto non chegou a materializarse. Os expertos din que un dos principais factores para que non se alcanzaron as cifras prognosticadas xorde pola falta de formación, malestar pola xestión nas empresas dos programas flexibles de traballo e á escaseza de información.

    Aínda que a porcentaxe de persoas teletraballando vai en aumento, parece que até agora moitas empresas se resistiron a adoptar medidas dirixidas á adopción do teletraballo.

     

    Informe completo: Teletrabajo, ha venido para quedarse Desconexión digital

  • CCOO consegue a mellora de condicións de case 500 traballadores e traballadoras de Prosegur AVOS en Galicia

    A Federación de Servizos de CCOO consegue a mellora de condicións laborais de case 500 traballadores e traballadoras de Prosegur AVOS en Galicia. Esta semana asinouse na Audiencia Nacional o acordo que remata co conflito colectivo iniciado en 2018 e que implica importantes novidades para todo o persoal, algo máis de 400 persoas na Coruña e máis de 80 en Vigo.

    Mediante este acordo, queda sen efecto o convenio de empresa con data retroactiva ao 1 de xuño deste ano, pasando todo o persoal a rexerse polo convenio estatal de centros de chamadas (contact center), o que implica subas salariais e maiores dereitos sociais. Segundo informa CCOO-Servizos, os incrementos salariais derivados do presente acordo, así como o pagamento de atrasos, non se fará efectivo ata a nómina do mes de xullo.

    Asemade, mantense a aplicación do convenio de oficinas e despachos para os colectivos procedentes da subrogación de persoal de HP Procesos de Negocio e CISER. Tamén se manteñen os acordos de mellora asinados pola empresa e os distintos comités: horarios reducidos en semana grande de agosto ou nos días 24 e 31 de decembro, permiso retribuído para asistencia a médica a centros privados de determinadas especialidades, acompañamento de menores e maiores a cargo ou pagamento de festivos, entre outros.

    Por último, cabe salientar que todo o persoal dado de alta na empresa a data do asinamento do acordo terá tamén dereito a gozar de vinte e catro días laborables de vacacións.