My New Site

Autor: Servicios Galicia

  • O comité de empresa de Froiz na provincia da Coruña esixe xornadas de traballo continuas

    O comité de empresa de Froiz na provincia da Coruña convocou este mediodía unha concentración na cidade herculina para esixir xornadas de traballo continuas, de xeito que se facilite a conciliación da vida persoal, familiar e laboral.

    Actualmente, existen dúas modalidades de xornada nos centros de Froiz na provincia: partida e mixta. Neste segundo caso, o persoal goza de catro días con xornada continua e outros dous con xornada partida.

    Durante a pandemia da COVID-19, unha das medidas adoptadas pola empresa foi a xeneralización da xornada continua para todo o persoal. Malia se tratar dunha situación puntual, demostrouse que organizativamente era posible que todas as traballadores e traballadoras gozasen desta modalidade de xornada.

  • Día do Orgullo LGTBI+ 2020

    A crise sanitaria e tamén social e económica fixo emerxer problemas enquistados. Quen xa partía dunha situación de vulnerabilidade non pode ver aínda máis agravadas as súas condicións de vida.
     
    — Cando dicimos #STOPLGTBIfobia queremos incidir en varrer a intolerancia e os prexuízos sociais que aínda persisten en relación coas persoas LGTBI+. 

    — Cando dicimos #STOPLGTBIfobia reafirmámonos na necesidade de avanzar en dereitos para todas as persoas LGTBI+.

    Este Orgullo 2020, organizado pola Federación Estatal de Lesbianas, Gais, Trans e Bisexuais (FELGTB), celebrarase o vindeiro día 4 de xullo cunha manifestación virtual baixo o lema «Sororidade e feminismo para TRANSformar. Mulleres lesbianas, trans e bisexuais en acción! Polas máis vulnerables!». Ler máis

    Serán as mulleres lesbianas, trans e bisexuais as protagonistas do orgullo deste ano, que reivindicará máis feminismo e máis dereitos. Porque ser lesbiana, trans ou bisexual significa enfrontarse tanto ao machismo imperante como á LGTBifobia.

    Unha manifestación reivindicativa e asemade festiva, á que CCOO se sumará, como vén sendo habitual, a través deste 28X Día Internacional do Orgullo LGTBI+  e á que sumamos a nosa participación na manifestación virtual do 4 de xullo.

    — CCOO continuará traballando fronte ao machismo e fronte á LGTBIfobia que golpea con especial dureza as mulleres trans, bisexuais e lesbianas.
     
    — CCOO continuará traballando en mellorar a vida e as condicións materiais de todas as persoas LGTBI+.
     
    — CCOO continuará traballando para que a igualdade no emprego sexa unha realidade, porque a situación actual é realmente preocupante: un 72 % das persoas LGTBI+ (7 de cada 10) evitan dicir que o son no seu posto de traballo porque entenden que lles prexudicará no seu desenvolvemento profesional, segundo datos do Proxecto Europeo Avanzando na xestión da diversidade LGTB+ no sector público e privado (ADIM).
     
    — CCOO seguirá demandando políticas non discriminatorias en materia de emprego, especialmente para as persoas trans, que se encontran un 80 % no desemprego. Ademais, un 38 % delas afirman que foron discriminadas á hora de buscar un traballo, segundo unha enquisa da Axencia de Dereitos Fundamentais da Unión Europea.
     
    — CCOO continuará traballando na negociación de cláusulas nos convenios colectivos que acaben coas discriminacións no mundo do traballo.
     
    — CCOO continuará esixindo a aprobación dunha lei estatal LGTBI+ que consolide dereitos no ámbito estatal e que aposte pola despatoloxización das persoas trans e polo dereito de autodeterminación de xénero.
     
    — CCOO continuará esixindo unha atención sanitaria que teña en conta as necesidades das persoas LGTBI+.
     
    — CCOO continuará traballando para que a diversidade sexual e de xénero estea presente nas aulas e para que nenos, nenas e adolescentes LGTBI+ non sufran ningún tipo de discriminación ou acoso.
    — CCOO continuará traballando na protección dos dereitos das persoas mozas LGTBI+ que durante esta pandemia se viron obrigadas a «armarizarse» diante das súas familias.
     
    — CCOO continuará denunciando os delitos de odio contra a poboación LGTBI+ e anima á súa denuncia.
     
    O Orgullo LGTBI+ estará presente este año en ventás, terrazas e balcóns. Será do 26 de xuño ao 5 de xullo e desde CCOO animámosvos a participardes tanto nestas accións de visibilidade e reivindicación como na manifestación estatal virtual do 4 de xullo ás 19.00 horas.

  • Por un pacto pola reconstrución social de España e de Galicia

    A pandemia provocada pola extensión da COVID-19 tivo consecuencias dramáticas para España, para Europa e para todo o mundo. Enfrontámonos a unha experiencia inédita, na que —para evitar a extensión do virus e o agravamento aínda maior do número de persoas contaxiadas, enfermas ou falecidas— tomáronse medidas de paralización da actividade económica ou restricións á mobilidade, como nunca coñeceramos.

    A economía quedou profundamente afectada tamén na nosa Comunidade: caída do PIB e incremento do desemprego, e milleiros de traballadores e traballadoras aínda seguen suxeitos aos ERTEs.

    Esta contracción da actividade económica incide nunha mala tendencia en relación á participación dos sectores industriais. Cómpre potenciar e apostar pola industria, pois é un vector fundamental para poder afrontar a recuperación económica.Queremos enviar toda a solidariedade, o apoio e o acompañamento sincero a todas as persoas afectadas, enfermas e ás familias e achegadas das persoas falecidas. Ler máis.

    España e Galicia sufriron e sofren, pero o noso pobo vai saír adiante. Vaino facer desde a reivindicación e o recoñecemento ao mundo do traballo. Ese que, cando case todo se detivo, estivo aí para garantir as subministracións básicas de toda a poboación, ás veces sen as medidas de protección sanitaria necesarias e poñendo en risco a súa propia integridade.

    Imos saír adiante se reforzamos os nosos servizos públicos, que son garantía para exercer os dereitos de cidadanía en igualdade. O noso sistema sanitario, sociosanitario e de coidados mostrou o valor dos seus profesionais, pero é o feito de contar cun sistema público e universal suficientemente financiado o que garante o acceso de toda a poboación á saúde e aos coidados. Nunca máis recortes en sanidade. Nunca máis mercantilización dos coidados.

    Demandamos uns servizos públicos de calidade, con empregos estables e con financiamento adecuado. A día de hoxe estamos lonxe dos obxectivos de converxencia coa UE: en relación ao PIB galego, como acontece no gasto sanitario, que supón o 6%, mentres na Unión Europea é do 7,9%.

    E sairemos adiante se non nos deixamos arrastrar pola confrontación e o odio. A crise sanitaria e económica máis intensa que coñecemos en tempos de paz non se pode acometer desde a dialéctica da guerra.

    Pedimos ás forzas políticas, sociais e económicas un gran pacto para a reconstrución social de España e Galicia. Unha aposta por reforzar os nosos servizos públicos. Un país, que é o noso, e que necesita traballar desde a concordia e afastarse da crispación.

    Nada máis. E nada menos.

  • É prioritario garantir a seguridade e a saúde de persoal e clientela na hostalaría

    CCOO e UGT dirixíronse ás patronais de hostalaría para que garantan a seguridade e a saúde de persoais e clientela no actual escenario de emerxencia sanitaria.  Certificar que no establecemento se implantaron as medidas de prevención adecuadas é o camiño para asegurar que non existen riscos para a saúde.  

    O Goberno promove un distintivo de Destino Seguro que está ligado  á aplicación das Guías de prevención configuradas polo sector e promovidas polo Ministerio de Industria, Comercio e Turismo. Ler máis

    O 21 de xuño acábase o Estado de Alarma, pero isto non significa que a situación de emerxencia sanitaria finalizase. De feito a situación pódese volver potencialmente máis perigosa a partir do 1 de xullo cando se abren as nosas fronteiras. Neste contexto é imprescindible garantir a seguridade e a saúde do persoal e a clientela dos establecementos de hostalaría.

    Tal e como establece a Lei de Prevención de Riscos Laborais (LPRL), as empresas teñen a obriga de avaliar o risco e establecer medidas de prevención adecuados para protexer a saúde do persoal. Por tanto, é necesario establecer plans de continxencia antes de que se inicie a a actividade, activando os órganos paritarios de prevención. Tamén será necesaria a avaliación dos Servizos de Prevención Alleos para poder establecer devanditos plans de continxencia.

    Un instrumento que pode axudar a garantir o cumprimento da Lei de Prevención de Riscos Laborais son as "Guías para a redución do contaxio polo coronavirus SARS-COV-2 no sector turístico" do MINCOTUR, coordinadas polo Instituto para a Calidade Turística Española (ICTE), xunto coa Secretaría de Estado de Turismo, en coordinación co Ministerio de Sanidade, que se elaboraron con ampla participación e consenso de administracións autonómicas e locais, asociacións sectoriais, patronais e os sindicatos CCOO e UGT.

    Asímismo, foron acordadas coa Asociación Española de Servizos de Prevención Laboral (AESPLA). Ademais, a estas Guías déuselles rango de "Especificacións UNE".

    As empresas teñen a obriga de avaliar o risco e establecer medidas de prevención adecuados para protexer a saúde do persoal. Por tanto, é necesario establecer plans de continxencia antes de que se inicie a a actividade, activando os órganos paritarios de prevención.

    CCOO e UGT entenden que a certificación promovida polo ditas guías debería servir para garantir a Seguridade e Saúde do Turismo en España e, por tanto, colaborar a restablecer a reputación do noso destino; pero tamén chaman a atención que para obter a dicir certificación, as persoas traballadoras a través dos seus representantes sindicais deben formar parte dos Comités de Continxencia e débense volver realizar as avaliacións de riscos á luz das medidas a fronte ao Covid19. Por tanto, non basta coa declaración responsable que puxeron en marcha algunhas administracións territoriais.

    O Covid-Free non é un mero autocolante de "quita e pon" posto nos escaparates de hoteis ou restaurantes.

    Finalmente, para garantir os dereitos de información, consulta e participación do persoal que establece a citada LPRL, a RLT débese ir incorporando ao traballo na mesma proporción que o faga o persoal, empezando polos/as delegadas de prevención.  Así mesmo, máis aló do que contemple a prórroga dos ERTEs, deben convocar á RLT para abordar as desescaladas e desafectacións, para garantir que estas se producen con normalidade e equidade

    Guías do Ministerio de Industria, Comercio e Turismo

  • CCOO esíxelles ás patronais da hostalaría que garantan a seguridade do persoal e da clientela

    A Federación de Servizos de CCOO esíxelles ás patronais de hostalaría de Galicia que garantan a seguridade e saúde dos traballadores e traballadoras e da clientela no actual escenario de emerxencia sanitaria, certificando que no establecemento están implantadas medidas de prevención adecuadas para asegurar que non existen riscos para a saúde. Ler máis

    A finalización do estado de alarma non significa que a emerxencia sanitaria acabase. De feito, a situación pódese volver máis perigosa a partir do 1 de xullo cando abran as nosas fronteiras, especialmente en Galicia que, atendendo a todos os índices publicados polas autoridades sanitarias, preséntase este próximo verán como un dos destinos turísticos máis seguros.

    Esta tendencia positiva tense que consolidar coa responsabilidade e o esforzo de todos os axentes implicados no sector do turismo, para que se converta en estable e duradeira no tempo, de forma que poida reforzar a imaxe de Galicia como destino seguro de cara ao próximo ano Xacobeo. Neste contexto, é imprescindible garantir a seguridade e a saúde do persoal e a clientela dos establecementos hostaleiros.

    A Federación de Servizos de CCOO Galicia lembra que, en cumprimento do que establece a Lei de prevención de riscos laborais (LPRL), as empresas teñen a obriga de avaliar o risco e establecer medidas de prevención adecuadas para protexer a saúde do persoal. Por tanto, urxe establecer plans de continxencia, activando os órganos paritarios de prevención. Tamén cumprirá unha actualización da avaliación dos servizos de prevención alleos para poder establecer os devanditos plans de continxencia.

    Un instrumento que pode axudar a garantir o cumprimento da LPRL son as «Guías para a redución do contaxio polo coronavirus SARS-COV-2 no sector turístico» do MINCOTUR, coordinadas polo Instituto para a Calidade Turística Española (ICTE), xunto coa Secretaría de Estado de Turismo, en coordinación co Ministerio de Sanidade. Elaboráronse con ampla participación e consenso de Administracións autonómicas e locais, asociacións sectoriais, patronais e os sindicatos CCOO e UGT; tamén foron acordadas coa Asociación Española de Servizos de Prevención Laboral (AESPLA). Ademais, a estas Guías déuselles rango de «Especificacións UNE».

    Para CCOO, a mellor vía para garantir que nun establecemento se implantan as medidas de prevención adecuadas é mediante unha certificación, que non pode basearse só nunha avaliación inicial; hai que activar un Comité de Seguridade e Saúde no que estea presente a representación legal dos traballadores, que asegure o cumprimento da Lei de prevención de riscos laborais e realice unha reavaliación dos postos de traballo tendo en conta as excepcionais circunstancias da crise sanitaria. Finalmente, para garantir os dereitos de información, consulta e participación do persoal que establece a citada LPRL, a representación legal dos traballadores e traballadoras, delegados e delegadas de prevención débense ir incorporando prioritariamente da situación de suspensión por ERTE.

    Así mesmo, máis aló do que recolla a prórroga dos ERTE, deben convocar a representación legal das persoas traballadoras para abordar as desescaladas e desafectacións, para garantir que estas se producen con normalidade e equidade.

    Carta conxunta