My New Site

Categoría: Accion sindical

  • As empresas da AEC queren que traballes 12 horas ao día

    Pensabas que as empresas de consultoría ían conformarse con que traballes de balde os sábados? Non traemos boas noticias.

    As empresas da Asociación de Empresas de Consultoría propuxeron na mesa de negociación do convenio que traballemos quendas de 12 horas e sen compensación ningunha. Deámoslle a benvida ao novo concepto de «media xornada» para os integrantes da Asociación Española de Empresas de Consultoría (AEC)! Ler máis

    Pensabas ir ao parque cos teus fillos ao rematar a túa xornada ás 18:00? Síntoo, terá que ser outro día, hoxe toca quedar ata as 22:00.

    Cea de amigos despois do traballo? Imposible, hoxe quedas ata as 22:00.

    E así ata que a empresa queira! E completamente de balde!

    Mi madriña, que oferta tan boa, é imposible rexeitala! Apúntaste?

    Axúdanos a que retiren a súa proposta asinando esta petición en "Change.org" https://bit.ly/NOPrecaryTIC, apúntaste?

    E non esquezas darlle máxima difusión en redes sociais #ConvenioTICdigno #NoPrecaryTIC .Seguiremos informándovos.

    CCOO É O TEU SINDICATO, AGORA MÁIS CA NUNCA. AFÍLIATE!

  • Empeza a negociación no convenio Comercio Alimentación Coruña

    Por fin recibimos por parte da patronal unha proposta, que aínda que está lonxe dun acordo, trata sobre os temas que nos preocupan e que desde CCOO valoramos que nos permite empezar a negociar:

    • Un convenio a 6 anos (2022-2027): Para CCOO é excesivo nuns tempos de tanta incerteza e coas variacións actuais de IPC, sobre todo cando a patronal descarta unha posible revisión salarial.
    • Eliminar o grupo IV: Crear un novo nivel no Grupo III  (teriamos 4 niveis), cambiando o tempo mínimo para promoción de 3 a 4  anos. Neste novo nivel porían ás persoas que contraten e non teña unha  experiencia demostrable de 3 anos no posto a cubrir.
      Desde CCOO temos que analizar con calma a repercusión que pode  ter, ademais NON PODEMOS ACEPTAR que o tempo para promocionar se suba de 3 a 4 anos. Ler máis
    • Reducir a xornada laboral: De 1.812 horas anuais a 1.805 horas anuais, con 2 fins de semana de calidade (un recuperable e outro non recuperable). A cambio  queren regular os 3 días de asuntos propios e que só se poida coller 1 cada 4  meses e sen unir a vacacións, sábados, festivos ou o mes de decembro.
      Para CCOO é imprescindible reducir a xornada anual. Por fin falamos de fins  de semana de calidade, pero NON NOS GUSTA relacionalo con regulación da licenza por asuntos propios, nin que aparezan días recuperables xa que iso non reduce a xornada.
    • Consolidación en contrato del 50% de las horas complementarias realizadas: Por motivos estruturais, de media nos últimos 12 meses, sempre se realizaron horas complementarias polo menos durante 11 meses nese mesmo período. Prodúcese unha mellora con respecto á situación de texto actual con 15 e 12 meses respectivamente.
    • Xornada Continua: A patronal segue a estudala e comprométense a presentar unha proposta. Lembramos que a xornada partida penaliza o gasto de acudir ao centro de traballo e agora coa subida do combustible, moito máis. HAI QUE BUSCAR UNHA SOLUCIÓN.
    • Transición Dixital: Están dispostos a estudar e negociar sobre a proposta presentada. Para CCOO é fundamental regular como pode afectar a dixitalización e a venda online, é prioritario evitar que esta se resolva no futuro con perda de postos de traballo.
    • Licenzas retribuidas: Buscar unha redacción para que poidan empezar no primeiro día hábil. Entendémolo como un avance, pero temos que ver cal é a redacción final para trasladar ao texto do convenio.
    • Incremento salarial: 2022: 2,75%, 2023: 2,5%, 2024: 2,25%, 2025: 2,25%, 2026:2%, 2027: 2%

    Desde CCOO só podemos facer unha interpretación: ESCASO. Non se corresponden coa realidade económica do sector, porque non sufriron 
    como outros esta crise; non se corresponde co sacrificio do persoal nestes tempos tan duros, e ademais sen incluír revisión salarial a subida poderíase quedar en nada se os IPCs se disparan.

  • As primeiras sentenzas contra o Hotel Balneario do Tremo decretan a nulidade dos despedimentos por existir fraude de lei

    Comisións Obreiras (CCOO) informa das primeiras sentenzas a favor dos traballadores e traballadoras despedidos do Hotel Balneario do Tremo, no concello de Brión. As tres resolucións xudiciais coñecidas ata o momento decretan a nulidade dos despedimentos por se considerar acreditada a existencia dunha fraude de lei para evitar cumprir cos dereitos de subrogación do persoal. CCOO, sindicato que asesora os demandantes, congratúlase desta vitoria xudicial e agarda que as restantes sentenzas que aínda están pendentes se pronuncien na mesma liña. Ler máis

    En termos moi similares, estas primeiras sentenzas coidan acreditada a existencia dunha fraude de lei para conculcar os dereitos laborais dos traballadores e traballadoras do complexo hoteleiro e termal. A empresa, anteriormente denominada Hotel Balneario de Compostela, pechou a comezos do 2021 no marco dun procedemento concursal previo á liquidación da sociedade. Contaba nese momento cun cadro de persoal de aproximadamente trinta persoas.

    A sentenza recolle como feitos probados que a empresa deu de baixa o persoal na Seguridade Social o 15 de xuño e que só dous días despois se constituía a nova empresa —que comparte cargos administrativos, instalacións, medios e provedores coa empresa extinta—. As novas contratacións comezan a producirse o 12 de xullo, menos dun mes despois, sendo incorporada á nova empresa aproximadamente a metade de traballadores e traballadoras que había antes do peche.

    A interrupción do vínculo laboral durante este tempo, menos dun mes, impediría automaticamente que as traballadoras e traballadores puidesen exercer o seu dereito a seren subrogados pola nova empresa nas condicións de traballo previas. Non obstante, a Xustiza ditamina que «si cabería derivar a responsabilidade excepcionalmente á nova empresa» en caso de constatarse a existencia dunha fraude de lei por parte das empresas codemandadas neste proceso.

    Así o consideran os xulgados composteláns, que verifican a existencia dunha fraude de lei por parte das empresas Hotel Balneario do Tremo S. L., Balneario do Tremo S. L. e Balneario de Compostela S. L., polo que decretan a nulidade dos despedimentos e instan ao pagamento dos salarios de tramitación e cantidades pendentes, así como á «readmisión inmediata» do persoal.

  • CCOO advirte que o peche patronal anunciado pola Asociación de Hostelería da Coruña non pode afectar aos dereitos laborais

    A Federación de Servizos de CCOO de Galicia advirte que o peche patronal anunciado pola Asociación de Hostelería da Coruña para o vindeiro luns, 28 de marzo, non pode afectar aos dereitos laborais. O sindicato aclara que este paro non é unha folga de traballadores e traballadoras asalariadas, senón unha medida promovida polas empresas, de maneira que non pode ter impacto ningún nas condicións de traballo.

    Entre outras cuestións, CCOO-Servizos recalca que esta decisión empresarial non pode repercutir nos salarios das persoas traballadoras nin no seu dereito ao descanso semanal ou día libre correspondente; tampouco cabe ningún desconto nas nóminas, nin modificación de xornada ou compensación con día de libranza establecido.

    En resumo, a Federación de Servizos de CCOO non vai consentir que un peche patronal, xestionado de forma unilateral e por iniciativa das empresas, «se leve a cabo á custa do salario e o dereito ao descanso do persoal da hostalaría».

    Por esta razón, CCOO-Servizos ponse ao dispor de todas as persoas traballadoras para que, en caso de incumprimentos, «nos comuniquen as incidencias co fin de denunciar ante a Inspección de Traballo as irregularidades ou ilegalidades cometidas».

    Entrevista en radio SER A Coruña

  • Concentracións nas sedes das grandes empresas clientes de Contact Center

     Ante a imposibilidade de negociación coa patronal do sector de Contact Center, CEX, e as actuais circunstancias que precarizan cada vez máis o persoal, ás organizacións sindicais non queda máis camiño que o de elevar o ton da protesta para dignificar estas condicións de traballo.

    O 22 de febreiro comezaron as mobilizacións convocadas por CCOO e UGT con asistencia masiva por parte do persoal cuxa situación é límite ante o devir dos acontecementos. Estase a reclamar unha maior presión cara ás empresas para saír da precariedade na que están estancadas: baixos salarios, abusos das xornadas parciais, dificultade para conciliar, riscos psicosociais polos elevados niveis de esixencia dos servizos, etc.

    Un dos graves problemas aos que se enfronta as traballadoras de Contact Center é que as subidas de prezos de produtos de consumo (IPC) non se está vendo reflectida en actualización salarial algunha o que esta provocando un empobrecimiento sistemático destas traballadoras. Tampouco se está cumprindo coa lei vixente no sector xa que non se está respectando a Lei de Teletraballo, de tal modo que as empresas seguen utilizando esta modalidade sen regulación e sen recoñecer o dereito a percibir unha compensación polos gastos xerados. E non se está respectando a lexislación sobre transparencia e igualdade retributiva e as empresas do sector continúan sen realizar auditorías.

    Desde CCOO advírtese á patronal de que a escalada de tensión neste conflito non vai cesar ata que sente a negociar e adquira unha posición de respecto e de compromiso ante un persoal que xa non pode aguantar máis.

    Imaxes da manifestación