My New Site

Categoría: Accion sindical

  • O persoal de Universal Support mobilízase contra os traslados

    O comité de empresa de Universal Support (grupo Konecta), que se dedica ao sector dos centros de chamadas, convocou esta semana dúas xornadas de mobilización, o luns día 20 e hoxe mesmo, xoves 23. O obxectivo, rexeitar o traslado de 81 traballadores e traballadoras da Coruña a Bergondo.Ler máis

    As concentracións do luns tiveron lugar en horario de 10 a 12 horas e de 15 a 17 horas diante do centro de traballo actual, no polígono coruñés de Pocomaco. Hoxe repítense as mobilizacións no mesmo horario, pero diante das instalacións de Konecta no polígono de Bergondo (rúa Parroquia de Rois, n.º 188).

    O persoal afectado polo traslado está adscrito ao servizo que Universal Support presta para Pull&Bear (Inditex). Xa o pasado xuño, a empresa notificáralle ao persoal que estaba teletraballando a súa intención de recuperar a presencialidade, pero en Bergondo. Naquela ocasión, a sección sindical de CCOO e do comité de empresa presionaron e evitaron que se desprazase as traballadoras e traballadores.

    Tras uns meses de calma, a empresa recupera a idea. Desde CCOO sinalan que o cambio de centro de traballo supón un «trastorno importante», xa que entre o centro de traballo actual e o novo hai máis de vinte quilómetros. Nalgúns casos, isto obrigaría a algunhas das persoas afectadas a abandonar o posto de traballo por careceren dunha combinación de transporte público.

    A sección sindical de CCOO rexeita enerxicamente este cambio de centro de traballo, «máis aínda tendo en conta que, desde o inicio da pandemia, se teletraballou sen incidencia ningunha». Ademais, lamentan a falta de solucións por parte da empresa, coñecedora dos prexuízos que esta medida ocasionaría.

    Imaxes das concentracións

  • A Xustiza dálle a razón a CCOO e rexeita os contratos temporais ligados a subcontratas

    A Audiencia Nacional dálle a razón á Federación estatal de Servizos de CCOO e considera nulos os contratos temporais ligados a unha subcontrata no sector dos centros de chamadas. Isto significa que unhas 40.000 persoas en todo o Estado poderán pasar a ter un contrato indefinido. Ler máis

    En decembro de 2020, o Tribunal Supremo ditaminara que, nas empresas cuxa actividade esencial é a prestación de servizos, os contratos deben ser indefinidos. Tras esta sentenza, CCOO foi o primeiro sindicato en presentar unha denuncia ante a Audiencia Nacional pola adaptación do convenio sectorial á normativa europea e a esta sentenza.

    A Audiencia estima a demanda formulada por CCOO, polo que anula e deixa sen efecto o seguinte parágrafo do artigo 14, b) do convenio colectivo do sector de centros de chamadas:

    «A tales efectos entenderase que teñen substantividade propia todas as campañas ou servizos contratados por un terceiro para a realización de actividades ou funcións de contact center cuxa execución no tempo é, en principio, de duración incerta e cuxo mantemento permanece ata a finalización da campaña ou o cupmrimento do servizo obxecto do contrato».

    Grazas a esta sentenza gañada polos servizos xurídicos de CCOO, milleiros de persoas que teñen contratos por obra e servizo poderán pasar a ter un contrato indefinido, dando estabilidade aos seus postos de traballo.

    Segundo CCOO-Servizos, a patronal do sector consideraba que esta cuestión non se debía dirimir nun xulgado, xa que se está a negociar o novo convenio. Non obstante, o tribunal sentenciador si recoñece que o seu pronunciamento pode incidir nas negociacións, pero trátase dun acontecemento «inevitable» pola tardanza das partes en chegar a acordo sobre o convenio vixente, xa caducado.

    Desde CCOO-Servizos agardan que a patronal «entre en razón» e entenda que «o mantemento do sector pasa por darlle estabilidade ao emprego».

  • CCOO rexeita o ERE anunciado polo Banco Sabadell, que xa tiña previsto o peche de 31 oficinas en Galicia

    A Federación de Servizos de CCOO de Galicia rexeita o expediente de regulación de emprego (ERE) anunciado polo Banco Sabadell. Malia que a entidade non comunicou polo momento o alcance desta regulación de emprego, o sindicato avanza que «non llo poremos fácil» e manterá unha «firme defensa do emprego», como nas outras reestruturacións que xa houbo no sector nos últimos meses

    Actualmente, o Banco Sabadell emprega en Galicia a 428 persoas que traballan en 98 oficinas. Porén, antes de se anunciar o ERE xa estaba previsto o peche de 31 destes centros de traballo, co que esta regulación de emprego «podería implicar a fin de máis oficinas e agravar a carencia de servizos financeiros en numerosos concellos galegos».

    Sen xustificación

    Para CCOO-Servizos, non concorren causas que xustifiquen o despedimento colectivo. De feito, no que vai de ano, malia o axuste de 1800 empregos no primeiro trimestre —40 deles en Galicia— entre prexubilacións e saídas voluntarias, fixo máis de 200 novas contratacións en todo o Estado, «sinal de que non sobra ninguén».

    O sindicato explica que tampouco o xustifican causas económicas, porque o Sabadell pechou o primeiro semestre do ano cun beneficio neto atribuído de 220 millóns de euros —un 51,5 % de incremento interanual— e prevé pagar un dividendo do 30 % do beneficio.

    Tampouco se dan razóns técnicas ou produtivas, pois non houbo cambios nin nos medios nin nos instrumentos de produción —que son financeiros e non sofren obsolescencia—, nin variou a demanda dos produtos e servizos financeiros. De feito, debido á pandemia hai máis demanda de refinanciamentos, avais do ICO e doutros organismos públicos, e proximamente os bancos serán os canalizadores dos fondos europeos Next Generation, o que incrementará a carga de traballo.

    Finalmente, CCOO sinala que non hai causas organizativas que se poidan aducir para este despedimento colectivo, xa que os posibles cambios de sistemas ou métodos de traballo non son alleos á entidade, «senón forzados por ela». Neste punto, a única razón organizativa podería ser a dixitalización, «pero nin sequera os clientes están tan familiarizados co contorno dixital como se quere dar a entender e como proba a afluencia ás oficinas», puntualiza o sindicato.

    Por todo iso, CCOO rexeitará calquera medida traumática en materia de emprego; calquera saída deberá ser voluntaria ou mediante prexubilacións anticipadas e xubilacións —no Banco Sabadell hai uns dous mil traballadores e traballadoras maiores de 55 anos—, na liña do asinado o pasado mes de decembro.

  • CCOO alerta do recorte de persoal na adxudicación do servizo de rastrexadores da Xunta

    A Federación de Servizos de CCOO de Galicia denuncia que a adxudicación do servizo de rastrexadores da Xunta de Galicia a unha nova empresa vai provocar unha importante deterioración deste servizo público. Malia se producir a adxudicación o pasado 29 de xullo, a data de hoxe non se lle facilitou á representación sindical a información sobre a data e condicións do traspaso do servizo, nin tampouco sobre o persoal afectado.

    Segundo a información de que dispón CCOO, no servizo de rastrexadores hai traballando unhas 650 persoas. Porén, co cambio de adxudicación preténdese comezar a campaña no mes de setembro cunhas 250 persoas, estando en risco a perda duns 400 postos de traballo. Todo isto, nunha situación actual onde o volume de casos de covid non deixa de aumentar.

    A Federación de Servizos de CCOO solicita unha reunión urxente coa Xunta de Galicia para esixir o mantemento do número de rastrexadores, entendendo que non é este o momento de recortar persoal.

  • A mediadora de seguros Asnorte contrata falsos autónomos para reducir custos

    En novembro do ano 2020 a Federación de Servizos de CCOO en Galicia iniciou unha campaña contra os falsos autónomos existentes na empresa Asnorte, axencia exclusiva de mediación de seguros de Santa Lucía.

    CCOO interpuxo unha denuncia ante inspección de traballo nas catro provincias galegas, denunciando a práctica fraudulenta na subscrición de contratos mercantís con persoas que estaban baixo a potestade organizativa de Asnorte.

    Esta campaña iniciouse tras contactar co sindicato máis dunha decena de persoas que consideraban que se atopaban baixo unha situación fraudulenta de contratación mercantil, que o que enmascaraba era unha relación laboral.

    Tras as devanditas denuncias, Asnorte procedeu á finalización de numerosos contratos optando a maioría das persoas afectadas acudir aos xulgados para o recoñecemento da vinculación laboral.

    Foron xa varias as sentenzas que a día de hoxe se resolveron favorables aos intereses das persoas traballadoras.

    A Federación de Servizos de CCOO de Galicia quere pór o foco na práctica habitual do sector onde se realizan contratacións fraudulentas vía a mercantilización das relacións laborais para evitar asumir os custos derivados dunha contratación directa.