My New Site

Categoría: Comercio Galicia

  • Carta á Xunta de Galicia: A liberdade de horarios vai en contra da saúde

    Desde a Federación de Servizos de CCOO de Galicia, entendemos como «inapropiada e inadecuada» a resolución sobre liberdade de horarios de establecementos de primeira necesidade, recollida no DOG núm. 51 do 15 de marzo de 2020.

    O acceso aos bens imprescindibles xa está garantido polo RD no que o Goberno declarou o estado de alarma, ademais da garantía expresada en múltiples comunicados por parte das grandes distribuidoras de alimentación, que indican que o abastecemento de todos os supermercados e hipermercados desta comunidade autónoma, ademais dos do resto do país, está garantido.

    A maioría das empresas do sector tomaron a decisión de reducir o seu horario comercial, co fin de poder atender tanto a reposición de mercadoría, como a desinfección dos centros, e así preservar as garantías de saúde do persoal e dos propios clientes, polo que non cabe facer normas que alenten un efecto chamada cara aos comercios de alimentación, cando o importante é que prevaleza a mensaxe á cidadanía #QuedaNaCasa Ler máis

    Por outra banda, este tipo de normas promove de maneira subrepticia, en opinión da Federación de Servizos de CCOO, a competencia desleal entre formatos comerciais no momento máis inoportuno. Non é hora de facer negocio e, sobre todo, non é o momento de poñer máis en risco a saúde das persoas traballadoras.

    Por todo iso, solicitamos da Xunta de Galicia a derrogación inmediata da medida adoptada respecto da Liberdade de horarios de establecementos de primeira necesidade.

    «Todos os establecementos comerciais de primeira necesidade exceptuados da suspensión no Acordo do Consello da Xunta de Galicia do 13 de marzo e neste acordo, e que, por tanto, poden continuar abertos, terán liberdade horaria para fixaren sen limitacións os horarios dos seus establecementos comerciais».

    Carta á Xunta de Galicia

  • Exposición ao contaxio: Os Comités de empresa de Gadis Pontevedra ratifican a denuncia de CCOO Servizos ante a empresa

    Con data 14 de marzo CCOO Servizos denunciamos ante a dirección da empresa Gadis (Mercartabria Coruña) unha serie de carencias que colocaban nunha situación de vulnerabilidade ao persoal ante a ameazada de infección por COVID19.

    Hoxe os comités de empresa de Gadis Pontevedra ratifican que en Gadis seguen prevalecendo os intereses económicos por diante da saúde do persoal, xa que a día de hoxe mantén o horario habitual, cando a maioría de supermercados e hipermercados acurtaron o tempo de apertura como medida preventiva.

    Xuntamos carta dirixida á dirección da empresa por parte de CCOO Servizos e comunicado emitido polos comités de Gadis Pontevedra

    Icons made by Flat Icons from www.flaticon.com

    Carta de CCOO Servizos a GADIS

    Comunicados comités de empresa

  • El Corte Inglés pon en perigo a saúde do seu persoal co COVID19

    NON IMPORTA A SAÚDE, nestes momentos para O Corte Inglés prevalece a súa ansia carroñeira e o seu afán de usar esta epidemia para facer caixa e incrementar os seus beneficios.Cando todas as indicacións sanitarias parecen dirixirse cara ao contrario, diminuír a presenza do persoal nos centros de traballo para tentar deter esta pandemia, O Corte inglés, nunha actitude mercantilista e que só pensa en beneficios económicos, decidiu expor durante máis tempo ao virus, tanto aos seus traballadores e traballadoras como aos seus clientes.

    CCOO entende isto como un acto de IRRESPONSABILIDADE, pero hai que deixar claro que conta co visto e prace e aval da Xunta de Galicia, que co seu decreto de liberdade horaria presentado polo Presidente Feijoo xusto antes da situación de alerta, permite esta calamidade.

    Como acto irresponsable o entenderon a maioría de empresas do sector de hipermercados e supermercados, xa que todas reduciron o seu horario, con excepción do grupo GADISA, empresa á que xa interpelamos tamén mediante escrito á súa dirección pola súa irresponsabilidade ao manter o horario de apertura. Ler máis

    Desde CCOO queremos facer público que tomaremos todas as medidas necesarias para tentar evitar esta actitude de competencia desleal, outras empresas pensaron primeiro tanto no seu persoal como no risco para a saúde da sociedade. Na decisión de aumentar o tempo de apertura, O Corte Inglés queda só.

    Tanto o seu persoal, como o do resto do sector da alimentación, merécese un respecto polo traballo, o sacrificio e o perigo ao que está exposto polo labor de abastecer a esta sociedade nestes momentos tan duros. A Dirección do Corte Inglés, NON ESTÁ Á ALTURA da xente que traballa para ela.

    Desde CCOO queremos solicitar da sociedade que sexa responsable, que faga prevalecer o interese por preservar a saúde das persoas e que reduza os tempos de compra, evitando especialmente acudir a comprar en domingo.

    Tamén comunicamos que nos poremos en contacto co presidente da Xunta o máis axiña posible, para solicitar que rectifique de forma urxente o decreto de apertura.

    De Luis García, CC BY-SA 3.0 es, https://commons.wikimedia.org/w/index.php?curid=29717801

  • SE TRABALLAS EN HOSTALARÍA OU COMERCIO… Sobre o peche de centros de traballo e como afectará aos cadros de persoal

    Ante o peche de determinados centros de traballo, desde a Federación de Servizos de CCOO de Galicia queremos contestar a aquelas preguntas que poden facerse as persoas que forman parte do persoal do sector: Ler máis

    Que vai pasar cos traballadores/as?

    As empresas afectadas veranse na obrigación de solicitar un ERTE de carácter urxente por causa de forza maior ante o peche obrigado dos centros.

     

    Que é un ERTE?

    É un Expediente de Regulación de Emprego Temporal, é dicir, unha suspensión temporal dos contratos.

     

    Como nos afecta o ERTE?

    O traballador/a pasa a cobrar a prestación por desemprego os días de duración do expediente.

    Salvo que o Goberno lexisle doutra forma, dadas as circunstancias excepcionais da situación, até o momento a percepción será do 70% da base reguladora, existindo melloras destas contías en caso de ter fillos menores a cargo.

     

    Ten o traballador/a que facer algún trámite?

    Salvo que haxa modificación neste aspecto, polo momento SI. Débese solicitar cita, de forma online ou telemática, no SEPE (Servizo Público de Emprego Estatal) para tramitar a presentación.

    As oficinas de emprego estableceron un protocolo de contención do virus, polo que non van atender presencialmente a ninguén. Farase toda xestión de forma telemática e/ou telefónica. Por iso, NON se terán en conta os prazos establecidos para solicitar as prestacións para que non se prexudique ningún dereito.

     

    Teñen que comunicar algo as empresas aos traballadores/as?

    Si, deben comunicar a todos os seus traballadores/as por escrito a orde de non asistir ao seu posto de traballo e informar o trámite do ERTE por causa de forza maior.

    Unha vez aceptado o ERTE deben emitir unha nova comunicación que sirva para o trámite individual da prestación por desemprego.

    Que documentación necesito para solicitar a prestación?

    – Comunicación da empresa onde se indique a afectación do traballador/a por o expediente

    – Demanda de emprego (debe tramitarse previamente no INEM)

    – Libro de familia

    – DNI

    – N° de conta onde quere que lle ingresen a presentación

     

    Afecta o ERTE ás miñas condicións laborais?

    Ao finalizar o ERTE, os traballadores/as incorporaranse ao seu traballo nas mesmas condicións salariais, de xornada, antigüidade, etc., que tivesen antes de iniciarse o mesmo.

    En caso de despedimento posterior, o período de ERTE computaría a efectos de indemnización.

    Para calquera outra dúbida, consulta ou pregunta, se hai representantes de CCOO na túa empresa, diríxeche a estas persoas. Se non é así, podedes contactar co voso sindicato no seguinte correo:

    comunicaciongalicia@servicios.ccoo.es

    Se pertences a unha empresa que pola súa actividade vai permanecer aberta e tes calquera dúbida, contacta tamén na dirección de correo anterior. Pedímosvos comprensión se tardamos un pouco en contestar as vosas dúbidas, estamos ante unha situación moi especial. Grazas.

  • «En Zara non queremos ser traballadoras de segunda»

    O cadro de persoal das tendas está crispado xa que leva moito tempo reivindicando a equiparación de condicións co persoal de loxística, ao que Zara resposta que “non se contempla”.

    Cabe salientar que o persoal das tendas é fundamentalmente feminino e na área de loxística masculino, o cal potencia aínda máis a brecha salarial. As tendas están discriminadas en condicións laborais, salarios e beneficios, ademais de sufrir recentemente a redución da posibilidade de acumular horas para utilizar libremente. Ler máis

    Na área de loxística teñen axudas para as escolas infantís, descontos e axudas nos libros para os fillos, até plus cando chegan á universidade, plus de sábados, plus de vacacións se as gozan fóra dos períodos máis demandados, comen por 25 céntimos na central de Arteixo, o persoal das tendas ten que levar a comida a un recuncho e ningunha desas axudas.

    Tamén se producen agravios en relación ás facilidades para conciliar: hai casos de compañeiras ás que non se lles aceptan as reducións de xornada. Solicítanse pero daquela a empresa negocia e obríga a ir sábados ou algunha tarde. Os casos rematan ante o xulgado.

    Os postos de responsabilidade en tenda teñen un incentivo por vendas cunhas cantidades de suplementos que ás veces son obscenas e as dependentas non teñen ese plus. Levamos anos pedindo que se reparta, por suposto de forma proporcional ao salario, entre todas as traballadoras da tenda.

    Lévase tempo pedindo un plan de xubilacións e de redución de xornadas cando se alcanza unha certa idade. Porque, aínda que non se vexa, nas tendas tamén hai un gran traballo de almacén, con accións repetitivas e transporte de cargas.

    Por todo iso hoxe comenzamos mobilizacións no Centro Comercial de Marinaleda de A Coruña para deixar claro que o persoal de tenda tamén pertencen ao grupo Inditex e pedir que a empresa se sente a negociar.

    Galería de imaxes