My New Site

Categoría: Hostalaría

  • Xuntanza de delegadas/os e afiliadas/os de Paradores de Galicia

     O pasado luns 5 de xuño tivo lugar nos locais de CCOO en Monforte de
    Lemos unha reunión de delegados e delegadas de Paradores de Galicia
    na que participamos a Sección Sindical de Galicia e delegados,
    delegadas, afiliados e afiliadas dos Paradores das provincias de Lugo
    e Ourense.

    Nesta reunión valoramos o plan de traballo desta Sección Sindical
    e debatemos sobre os problemas máis importantes que afectan ó
    persoal destes Paradores de cara a buscar solucións para cada un
    deles. Segue

     A conclusión máis importante que sacamos desta reunión é a
    necesidade que temos todos os traballadores e traballadoras de
    Paradores de reforzarnos sindicalmente para defender en conxunto os
    nosos intereses. Neste mundo globalizado é imporante que se
    globalicen tamén os dereitos que como clase traballadora nos
    corresponden e iso só se acada estando organizados, para o que
    entendemos que CCOO é a ferramenta axeitada e necesaria. Nestes
    momentos nos que se intenta por todos os medios desprestixiar as
    organizacións sindicais para eliminar a ferramenta que
    historicamente tivemos a clase traballadora para defendernos, temos
    que ser máis intelixente e non permitilo. Por isto un dos obxectivos
    principais que nos marcamos a representación de CCOO en Paradores de
    Galicia é trasladar ao conxunto dos traballadores e traballadoras a
    necesidade de afiliarse e organizarse.

    Tamén decidimos trasladar á dirección de Recursos Humanos da
    empresa a través do seu representante na zona norte, os conflitos
    que nestes momentos ocupan e preocupan a representación de CCOO     nos
    Paradores de Galicia co obxectivo de buscar solucións negociadas en
    primeira instancia antes de iniciar outras vías de solución.

    A Sección Sindical de CCOO de Paradores de Galicia, queremos
    transmitir a todos os traballadores e traballadoras a nosa intención
    de seguir traballando na mellora das condicións de traballo para
    todo o colectivo, comezando pola recuperación de dereitos e
    condicións de traballo que tanto esforzo custou conseguir e que
    quedaron no camiño por mor da negociación do ERE    .

  • Mobilizacións do persoal de cociña do Hospital do Salnés

    Tras tentar negociar coa dirección da empresa un calendario laboral
    acorde ao convenio e á lexislación vixente e tras pasar pola Inspección de Traballo sen conseguir unha solución acorde, os
    traballadores e traballadoras de cociña do Hospital do Salnés
    decidiron poñer un Conflito Colectivo ante a maxistratura e iniciar
    mobilizacións que comezaron cunha concentración ás portas das
    instalacións do hospital o pasado 5 de maio.

    Xornadas de 50 horas semanais e de oito días consecutivos de
    traballo sen descanso e a contratación insuficiente, en precario e
    en fraude de lei dos traballadores e traballadoras que realizan
    substitucións; son algunhas das cuestións que é necesario
    solucionar.

    Unido á reivindicación dun calendario laboral axustado, reclámase
    tamén a necesidade de cubrir o persoal necesario convenientemente
    para poder dar un servizo en condicións aos usuarios do hospital. A
    presión por ter que sacar o traballo cun persoal insuficiente recae
    ademais sobre os 15 traballadores e traballadoras ás que se lle
    esixe que cubran un traballo que necesita dun maior persoal.

    A negativa da dirección da empresa concesionaria do servizo, Eurest
    Colectividades, de solucionar estes importantes problemas é a que
    provocou que o persoal se vise na necesidade de mobilizarse e acudir
    á xurisdición laboral.

    Tras esta primeira concentración do 5 de maio realizarán outra,
    tamén ás portas do hospital, o próximo día 11 de 11:15 a 11:30, e
    ás portas da Audiencia Nacional de Pontevedra o próximo 23 de maio
    de 10:45 a 11:15 aproveitando a celebración do xuízo.

    Juan Bao, delegado de CCOO, explícao en «La Voz de Galicia»

  • Xuízo polo despedimento de dous delegados de CCOO no Gran Hotel La Toja

    Mañá
    xoves, día 4 de maio, terá lugar en Pontevedra o xuízo polo
    despedimento de dous delegados de CCOO no Gran Hotel La Toja (O
    Grove), complexo hoteleiro xestionado polo grupo Hotusa. Por tal
    motivo, o sindicato convoca aos seus delegados e afiliados a asistir
    ao xuízo no Xulgado de Pontevedra.

    CCOO
    xa denunciou meses atrás «represión» contra este sindicato por
    parte da dirección do hotel grovense, actitude materializada no
    despedimento de dous delegados sindicais que reiteradamente esixiran
    o cumprimento dos compromisos adquiridos por Hotusa tras a aplicación
    dun expediente de regulación de emprego (ERE).

    As
    dúas persoas despedidas teñen unha antigüidade de 17 e 34 anos,
    unha profesionalidade «intachable», así como un «gran traballo
    sindical» en defensa dos seus compañeiros e compañeiras. As
    persoas despedidas denunciaban incumprimentos da cadea hoteleira,
    como o non pagamento das horas extras realizadas durante a vixencia
    do ERE. Segue

    Promesas
    incumpridas

    Desde
    a Unión Comarcal de CCOO de Arousa criticamos a «hipocrisía»
    dos responsables de Hotusa, pois cando se fixeron cargo das
    instalacións -hai máis un ano-, prometeran garantir todos os
    postos de traballo, amais de respectar as condicións laborais de
    todo o persoal por escrito nun documento asinado por todos os
    traballadores afectados.

    Desde
    CCOO lembramos que o Gran Hotel era un «referente» na hostalaría
    galega, pero que a consecuencia do ERE,
    dos recortes e da sobrecarga de traballo do persoal, padeceu unha
    «notable deterioración» tanto en mantemento como nos servizos
    ofertados. CCOO Arousa denunciamos , asemade, que o incremento da
    carga de traballo se fixo mantendo «salarios de miseria», incluso o
    caso dun traballador ao que se lle propuxo ser xefe de mantemento,
    con localización telefónica as 24 h, por só 900 euros mensuais.

    Ante
    este estado de cousas, desde a Unión Comarcal de CCOO de Arousa
    preguntámonos onde está o «investimento millonario» que se
    prometera para que o Gran Hotel contase con «emprego de calidade» e
    seguise a «crear riqueza na comarca» e no pobo de O Grove.

    Vilagarcía
    de Arousa. 3 de maio de 2017

    SECRETARÍA
    XERAL UNIÓN COMARCAL DE AROUSA

    630969055
    | ciglesias@galicia.ccoo.es

  • Firmado o Convenio Colectivo de Hostalaría da provincia de A Coruña que beneficiará a 20.000 traballadoras e traballadores

    O 24 de abril de 2017, despois
    dunha intensa negociación que viña desenvolvéndose desde a
    finalización da vixencia do anterior convenio en decembro de 2015,
    conseguimos chegar a un acordo de Convenio Colectivo para o sector da
    hostalaría da Provincia da Coruña.

    O acordo está asinado polas
    centrais sindicais CCOO e UGT sobre a base do anterior texto de
    Convenio Colectivo, cunha serie de melloras que queremos destacar:

    – Vixencia 2016-2018.

    – Xornada máxima anual de
    1792 horas, con control de presenza diario e rexistro de hora de
    entrada e saída.

    – Descanso de 15 minutos para
    xornadas de cinco horas ou máis.

    – Salario 2016 sen incremento.

    – Salario 2017 Incremento
    sobre táboas do 1,5% con revisión de IPC

    – Salario 2018 Incremento
    sobre táboas do 2% con revisión de IPC

    – Ultraactividade do convenio
    unha vez finalizado e mentres se negocia un novo, ata 24 mes máis do
    que indique a lei.

    Conseguimos
    que por fin apareza por escrito no Convenio Colectivo a
    OBRIGATORIEDADE
    DE CONTROL DE PRESENZA DIARIO CON REXISTRO DE ENTRADA E SAÍDA    ,
    como un paso primordial para poder controlar os excesos de xornada
    diarios, a falta de descanso diario e semanal, o traballo en festivos
    sen que estes se
    recuperen
    ou a fraude da contratación a tempo parcial daquelas persoas que fan
    tantas horas extras que chegan a tempo completo.

    A dificultade de incluír este
    artigo, vese reflectida en que unha parte da patronal negouse a
    asinar o acordo de Convenio Colectivo.

    CCOO non vai parar ata
    conseguir que a famosa frase de que «na hostalaría non hai
    horarios», quede no esquecemento e os traballadores e traballadoras
    de Hostalaría poidan ter unhas condicións de traballo que lles
    permitan conciliar a súa vida laboral e familiar, tal e como fan o
    resto de traballadores e traballadoras deste país.

    Entrevista na cadea SER: A partir do minuto 12:05, Juan Zas, Secretario de Acción Sindical da Federación de Servizos de CCOO analiza a recente firma do Convenio de Hostalaría de A Coruña e a inclusión da obrigatoriedade de control de presenza diario con rexistro de entrada e saída.

  • CCOO Servizos estrea representatividade na empresa Alimentación Saludable

    No día de hoxe culminou o proceso de eleccións sindicais na empresa Alimentación Saludable, do sector de Restauración Colectiva e que desenvolve a súa actividade en comedores escolares e en actividades extraescolares.O resultado das votacións deu como vencedor a CCOO cunha nova delegada, sendo esta a única candidatura que se presentou.

    CCOO agradece o apoio do persoal pola súa participación democrática e polo apoio outorgado á nosa candidata, comprometéndonos a traballar para ser útiles e eficaces e poder intervir con máis garantías no devir da empresa e do sector.