My New Site

Categoría: Hostalaría

  • CCOO esiximos mellores condicións laborais e unha aposta pola profesionalización para paliar a falta de man de obra na hostalaría

    A falta de man de obra na hostalaría é unha queixa recorrente nas empresas e patronais do sector, especialmente nos períodos de maior demanda por mor do turismo. Fronte a isto, a Federación de Servizos de CCOO esiximos mellores condicións laborais, pois entendemos que é a razón de fondo que explica esta dificultade para contratar persoal cualificado. Así o expresou o sindicato nunha conferencia de prensa en que interviron Lucía Trenor, secretaria xeral de CCOO-Servizos; Juan Zas, secretario de Acción Sindical de CCOO-Servizos; José Mirás, responsable de hostalaría de CCOO-Servizos.

    Catro son os factores principais que cómpre corrixir: política de contratacións, conciliación da vida persoal e laboral, salarios e competencia desleal.

    Contratación

    A reforma laboral contribuíu a unha «leve mellora» na temporalidade dos contratos de traballo no sector, explica CCOO, cunha taxa do 6 % no subsector dos servizos de aloxamento, pero con cifras do 20 % no resto da hostalaría e restauración. Ao tempo, aumentan os contratos a xornada parcial, con cifras dun 24 % no sector do servizo de aloxamento, «moi por riba da estatal, dun 10,3 %», chegando ao 36 % na restauración.

    Conciliación

    Os excesos nas xornadas intensivas de traballo, o continuo cambio de quendas horarias e calendarios e o incumprimento dos descansos legais «xeran un grave problema de conciliación» da vida laboral e persoal. De feito, é un dos principais motivos de consultas e reclamacións que canaliza CCOO-Servizos no sector.

    Remuneracións

    En Galicia hai catro convenios provinciais con condicións moi dispares, tamén no que respecta aos salarios. Por exemplo, as retribucións recollidas no convenio provincial de Lugo para o posto de recepcionista son case 126 euros menores á mesma categoría na Coruña, diferenza que chega aos 136 entre unha camareira de piso de Pontevedra respecto dunha coruñesa.

    Actualmente, o convenio de Pontevedra está en plena negociación, mentres que en Lugo «os salarios non son atractivos para quen poida estar interesado en traballar no sector».

    Competencia desleal e masificación

    Doutra banda, CCOO salienta os problemas derivados da afluencia masiva de turistas e a «competencia desleal e negativa» dos pisos de alugamento turístico, que no último ano aumentaron en Galicia case un 16 %, máis do dobre ca a media estatal (7 %). En concreto, pasouse de 12.695 a 14.775 na comunidade autónoma, mentres no Estado o aumento foi de 285.868 a 305.136.

    Noticia en:

    La Voz de Galicia

    El Español

    Cadena SER

  • CCOO desmente que en España falte persoal para traballar na Hostalaría, o que faltan son condicións de traballo dignas e mellores salarios

    Para CCOO Servizos, en España hai suficiente e cualificada man de obra no sector de Hostalaría, as dificultades esgrimidas polas patronais son debidas á precariedade, os baixos salarios e as deficientes condicións laborais (quendas partidas, dificultade conciliación vida laboral e familiar, nin tan sequera un fin de semana de descanso ao mes).

    Hai moitas persoas que abandonan a profesión e optan por traballar noutros sectores. Ler máis

    Concretamente, segundo datos de CCOO Servizos, desde o inicio da pandemia, máis de 70.000 persoas abandonaron a profesión, buscando máis estabilidade así como melloras sociais e económicas noutros sectores. É dicir, o que está a ocorrer en España, é que as patronais Hostaleiras optaron por buscar man de obra barata ("escrava") doutros países antes que mellorar as condicións laborais do persoal, sen ter en conta que, a escaseza de persoal, de forma puntual, débese ás condicións laborais precarias do sector. Persoal para traballar en Hostalaría hai, pero é necesario que se lle ofreza seguridade laboral e boas condicións salariais e de traballo.

    • Segundo os datos de afiliación á Seguridade Social, en 2022 houbo 1.352.782 persoas traballadoras por conta allea contratadas no sector, o que supera nun 0,53% a afiliación media de 2019 (1.345.603). Doutra banda, analizando os datos de afiliación á Seguridade Social da Hostalaría en España vemos que esta tivo un incremento de 201.954 empregos con respecto ao ano anterior (+13,71%). Por tanto, queda claro que todas as ofertas de emprego se cubriron, contradicindo estes datos, unha vez máis, aos que critican a falta de persoal na Hostalaría e evidenciando que as prazas de traballo que non se cobren son as que ofertan condicións inaceptables e en moitos casos fraudulentas.

    Por tanto, a nosa resposta ás queixas da patronal sobre a falta de persoas cualificadas, é que invistan en condicións dignas de traballo e en formación do seu persoal (a formación non é un gasto, é un investimento) e mellore as súas condicións salariais e de traballo, que é a única forma de reter aos profesionais do sector, e que non vexan a profesión de Camareiro/a, Cociñeiro/a ou Camareiro/a de Pisos como unha ocupación temporal, senón como unha profesión con percorrido profesional que lles permite vivir dignamente e conciliando a súa vida laboral e familiar.

    • Un grave problema engadido á falta de persoal en Hostalaría nalgunhas zonas turísticas, é a perentoria falta de vivendas e o encarecemento dos prezos de alugueres, o que provoca que, en moitos casos, máis da metade de salario vaise no pago do aluguer dunha habitación. Por tanto, estes son problemas que as patronais deben asumir se queren que as persoas se despracen no verán dunhas comunidades a outras; e o mesmo respecto ás persoas traballadoras que veñan doutros países.
    • Outra das cuestións a resolver no sector, é a aposta pola estabilidade no emprego, xa que a pesar de que se mellorou como consecuencia da última Reforma Laboral, constátase que a taxa de temporalidade e parcialidade, en moitos casos indesexada, é aínda moi superior ao conxunto dos sectores da economía española.

    Analizando os datos de temporalidade e parcialidad, apréciase o crecemento do emprego indefinido por conta allea en Hostalaría nun 26,40% con respecto ao que había o ano anterior, pasando dos 773.849 de 2021 aos 978.167 cos que finalizou de media o ano 2022. (372.707 en 2021 e 344.927 en 2022). Ademais, aumentou o emprego a tempo completo nun 22,82%, pasando dos 769.944 de 2021 a 945.663 de 2022, e tan só se incrementou nun 0,23% a xornada parcial (de 376.612 a 377.460). O emprego a tempo parcial é o 31% (24% en homes; 37% en mulleres), sendo o 50% o índice de parcialidade non desexada (55% en homes; 47% en mulleres) e tan só se incrementouse nun 0,23% a xornada parcial (de 376.612 a 377.460.

    • Por último, dicir que, de cara ao futuro inmediato (que presenta signos de forte crecemento no sector), é fundamental crear as condicións para facer que a Hostalaría e o Turismo sexa atractivo para persoas mozas e mediante a formación pór en valor as distintas profesións do sector, para o que, é prioritario desbloquear a negociación colectiva naqueles convenios que seguen sen renovar, así como darlle un pulo ao Acordo Laboral de Hostalaría de Ámbito Estatal con mais contidos para mellorar as condicións laborais en conceptos como salarios, horarios, conciliación, saúde laboral e tamén conseguir que, mediante unha boa formación sectorial, se poida apreciar que existen grandes oportunidades de traballo estable e de futuro.

  • Asinado o novo convenio provincial da hostalaría da Coruña

    A Federación de Servizos de CCOO de Galicia informa do asinamento do convenio colectivo da hostalaría da provincia da Coruña. O sindicato salienta que este convenio permite mellorar os salarios, cunha suba do 11,75 % durante a vixencia do texto. Tamén inclúe melloras para a conciliación da vida familiar e laboral, en materia de formación e tamén no tocante á contratación, coa transformación de contratos a tempo parcial noutros a tempo completo.

    O novo convenio ten vixencia ata o 2024 e inclúe unha suba salarial para este ano do 4%, do 3,75% para o 2023 e do 4% no derradeiro ano de vixencia. Para este ano prevese o pagamento de atrasos con carácter retroactivo desde o 1 de xaneiro, que se deberán aboar antes de marzo do 2023. Se o IPC acumulado durante a vixencia do convenio supera o 11,75%, axustarase nas táboas salariais do ano 2025 co 50% da diferenza.

    Contratación e condicións laborais

    En materia de contratación, os fixos-descontinuos terán un chamamento mínimo de cinco meses, cun preaviso de dez días. Haberá posibilidade de consolidcación do 50% se superan os cinco meses en dous anos. Estas mesmas condicións esténdense aos contratos a tempo parcial, cun mínimo de catro horas de xornada diaria e vinte de semanal.

    Asemade, os contratos indefinidos deberán representar, polo menos, o 65% dos rexistrados na empresa.

    Dereito á desconexión

    As empresas non poderán enviar mensaxes ou correos profesionais fóra do horario laboral agás en casos de urxencia e non poderá haber sancións polo feito de non atender as citadas comunicacións.

    Formación

    Establécese un complemento de vinte euros mensuais para cada persoa traballadora en empresas que non acrediten impartir formación nas condicións que establece o convenio.

    Camareiras de piso e repartidores

    Por outra parte, a partir do 1 de abril do vindeiro ano, á categoría de camareiro ou camareira de piso aplicaráselle a regulación establecida no artigo 42.6 do Estatuto dos traballadores —de aplicación para as empresas contratistas e subcontratistas.

    Así mesmo, nas empresas onde as persoas traballadoras fagan reparto a domicilio en vehículo, aplicaráselles o convenio de hostalaría da provincia da Coruña.

    Publicación no BOP Coruña

  • Concentración polo convenio do Hostal dos Reis Católicos, vencido desde o 2010

    O persoal deste establecemento hostaleiro de Santiago de Compostela vén reivindicando a sinatura dun novo convenio desde o ano 2010, data na que caducou a súa vixencia.

    Despois de moito tempo de negociacións xa é a segunda vez que se chega a un preacordo, porén, a empresa non materializa a súa sinatura e polo tanto non é aplicable o texto acordado.

    Despois de moitas reunións, mobilizacións, folgas, mediacións e arbitraxes, o persoal do Hostal concentrouse diante dos xulgados para demandar ante a xustiza que se publique o convenio e se incrementen os salarios, conxelados desde o seu vencemento.

  • CCOO pide compromiso para loitar contra os riscos laborais no sector das camareiras de pisos

    CCOO celebrará os meses de maio e xuño, encontros con camareiras de pisos, dentro do programa de “Intervención preventiva con traballadoras/es dos departamentos de pisos dos establecementos hostaleiros” financiado polo Plan de Nacional sobre Drogas, onde analizará e debaterá sobre o consumo de fármacos, hipnosedantes, analxésicos opioides e outras drogas. Ler máis

    No marco da campaña "Os teus dereitos, a mellor medicina”, impulsada por CCOO, celebraranse encontros con camareiras de pisos de Zaragoza, Santander, Toledo, Mérida, Coruña, Logroño, Bilbao e Oviedo, delegadas de persoal e de prevención de riscos laborais, ao longo destes meses. Nestes encontros preténdese dotar ás delegadas de ferramentas que lle permitan velar polo cumprimento da normativa en materia de prevención de riscos laborais, así como levar un papel activo nos Comités de Seguridade e Saúde.

    Tras a incorporación aos centros de traballo despois do parón da COVID-19, o colectivo de camareiras de pisos experimentou un importante aumento das cargas de traballo, de seu xa bastante altas antes da pandemia, o que unido a: existencia de temporalidade, precariedade no emprego, contratos parciais fraudulentos, xornadas interminables e o incumprimento das condicións salariais que estipulan os convenios de hostalería, lévanos a dicir que chove sobre mollado. É dicir, a hostalería tivo e mantén todo o malo do mercado laboral de España. O aumento das cargas de traballo está a supoñer un sobreesforzo que non foi avaliado de acordo cos artigos 15 e 16 da Lei 31/1995 e que provocou directamente un empeoramento das condicións laborais, co consecuente impacto na saúde, que ademais leva a un consumo elevado de medicamentos (analxésicos, antiinflamatorios, hipnosedantes) para poder finalizar a xornada laboral.

    “Mesa Tripartita por un Emprego de Calidade en Hostalería”

    CCOO insta o Goberno para que convoque canto antes a “Mesa Tripartita por un Emprego de Calidade en Hostalería”, constituída na anterior lexislatura, para avaliar estes riscos e poder aplicar as medidas preventivas oportunas. Tamén considera que se debe abordar un procedemento que permita establecer coeficientes redutores para anticipar a idade de xubilación das camareiras de pisos, sen perda económica na súa pensión, así como insistir na urxencia de garantir que as mutuas apliquen o Real Decreto 1299/2006 en toda a súa extensión e o oficio da Dirección Xeral de Ordenación da Seguridade Social do 21 de setembro de 2018, e se recoñezan como profesionais todas as patoloxías recollidas na nosa lexislación e que son moi prevalecentes no colectivo de camareiras de piso.

    CCOO volve demandar que se realicen inspeccións de traballo que saquen á luz as verdadeiras condicións destas traballadoras. Débese insistir, ante as empresas e ás comunidades autónomas no fundamental que é desenvolver unha acción preventiva orientada aos riscos laborais correctamente identificados, incluíndo algo que poucas veces se ten en conta que é a política de compras de empresas, así como as lexislacións en materias turísticas que deben incluír por exemplo: camas con rodas que se eleven, material ergonómico, produtos de uso para a limpeza non tóxicos. En definitiva, que a organización do traballo conte coa participación das traballadoras, que se mellore e incremente a formación e información e que a vixilancia da saúde sexa específica para esta profesión.

    Por último CCOO valora positivamente o novo artigo 42.6, que se garanta a aplicación do convenio sectorial de hostalería conforme establece o RDL 32/2021. Por tanto, se se subcontrata o servizo de camareiras de pisos, a actividade que van desempeñar as traballadoras de contrata nun hotel, aínda que no contrato entre as partes poida figurar que é para a realización de tarefas de limpeza, a realidade é que van desempeñar funcións de camareira de pisos, unha actividade, cuxas tarefas veñen recollidas tanto nos Convenios Colectivos Sectoriais de Hostalería como no Acordo Laboral de Hostalería de Ámbito Estatal ( ALEH), onde as camareiras de pisos están encadradas na área funcional cuarta no grupo 2 que é o grupo dos profesionais. Ademais da aplicación do convenio sectorial, CCOO vai loitar no marco do ALEH, nos tribunais, ante a Inspección de Traballo e a través das mobilizacións, para a limitación da subcontratación de actividades propias e para que as empresas empresas cumpran coa aplicacións dos convenios sectoriais de hostalería.

    CCOO chama ás patronais para negociar de forma rigorosa e respectuosa coa representación sindical para evitar a escalada de tensión e conflito á que está levando a situación de bloqueo da negociación colectiva que está tendendo dramáticas consecuencias para o persoal.